A Title-less Blog -- مدونة بلا عنوان

فارس الأحلام مش جاي

2012-01-14T09:23:00.000-08:00

مشكلتنا ان احنا اتربينا من صغرنا على ثقافة "فارس الأحلام"...

البنت بتتربى على انها تستنى العريس اللي هييجي ياخدها و يعيشها زي الأميرة في عش الزوجية السعيد و يخلي حياتها أحلى... لكن مع الوقت لما البنت بتكبر بتكتشف ان دي كلها أوهام، و إن فارس الأحلام ده موجود في قصص الأطفال و بس.

لكن للأسف الثقافة دي طلعت مش بتقتصر عندنا على البنات و الجواز و بس، بل هي تعم كل فئات الشعب تقريبًا...

بعد تنحي المخلوع، كل الناس ابتدت تحلم بالرئيس القادم المذهل الذي سيغير كل شيء... اللي هييجي يصلح المشاكل الاقتصادية و السياسية و الاجتماعية، و هيغير التعليم و الصحة و يحسن كل الخدمات، و هينظف الداخلية و يبيد الفساد، يعني اللي باختصار هيبقى بمثابة رابسو اللي هينضف المنطقة!

و كتير أوي، و دي غلطة أنا شخصيًا كنت بقع فيها كتير، لما نُذهل باختراع جديد قامت به أحد الدول نلاقي نفسنا بنقول: امتى ييجي حد عربي يخترع حاجة زي دي؟ امتى نلاقي حد عربي طلع القمر؟ امتى يبقى عندنا شركة زي مايكروسوفت و لا آبل بس مصرية؟ امتى نبتدي ننتج عربية زي المرسيدس كدة؟

أحب أقولكم ان الشخص اللي الناس مستنياه يعمل كوووول ده مش هييجي! فارس الأحلام مش هييجي! سوبر مان مجرد شخصية خيالية!

أبسط سؤال ييجي في بال الواحد هو: الشخص اللي احنا مستنيينه ده في ايه زيادة عن أي حد فينا؟ ما هو أكيد هيبقى بني آدم زينا، بس بني آدم إيجابي مش مستني حد هو اللي ييجي يعمله كل حاجة هو بيحلم بيها.

التغيير مبيجيش على ايد شخص، التغيير بييجي على ايد ناس مؤمنة بالتغيير ده و مستعدة انها تتعب و تجتهد عشان تحققه.

لو انت بتحلم بحاجة، قوم انت و حاول تحققها، و لو مقدرتش تحققها ع الأقل حاول تروج لفكرتك دي و توصلها للناس و تلاقي اللي يساعدك في تحقيقها. حاول تساهم و لو بكلمة في تحقيق التغيير، و حط في بالك انه مش هيتحقق إلا بمجهود و وقت و صبر!

الفاسد اللي حكمنا سنين زرع فينا السلبية دي، زرع فينا فكرة ان كل الأمور موجودة في ايد بني آدم واحد و إن باقي الشعب دول مبيفهموش و لا بيعقلوا و لا هيعرفوا يغيروا حاجة. الفاسد دايمًا بيبقي عايزك انت تقعد مستريح و تمارس روتين حياتك كما هو، و هو اللي يقعد يفكرلك و يحللك و يختارلك و بعدها يزرعلك كل الأفكار اللي هو طبخها دي في دماغك. انت مش ناقصك حاجة، انت مسؤول انك تدور و تفكر و تحلل بنفسك و توصل لنتايج بردو بنفسك. متخليش حد يقعدك متكتف، انت قادر انك تساهم في تحقيق أي حلم انت بتحلم بيه سواء لنفسك أو لعيلتك أو لبلدك!

طز في حقوق الإنسان؟ متأكد؟

2011-12-27T23:19:00.000-08:00

في كل مظاهرة تقوم تقريبًا بيكون في على الأقل شكل من أشكال انتهاك حقوق الإنسان, و أغلب الانتهاكات بتيجي من جهة السلطة بالطبع لإنها هي صاحبة القوة الأكبر من عدة و سلاح و في الأغلب بتفرط في استخدامها.

و وقت كل مظاهرة, بطبيعتنا ناس متعودين على الحياة الهادئة و مبنشوفش الدم و العنف قدامنا كل يوم لإننا لا عايشين في بلد محتل و لا الحمد لله عندنا حرب أهلية, بتنتشر مشاهد هذه الانتهاكات بشكل كبير على كل أنواع الإعلام و بيتم التعليق عليها في الأغلب باندهاش و صدمة شديدين جدًا. و في التعليقات على هذه المشاهد لازم تستخدم عبارة "تعدي على حقوق الإنسان" أو "انتهاك حقوق الإنسان", و لإن قضايا حقوق الإنسان قضايا عالمية فالكلمات دي بيبقى ليها صدى.

الناس اللي ضد هذه المظاهرات و مع هذه التعديات (و منقدرش بأي شكل ننكر انها تعديات, حتى لو انت شايف انه تعدي مبرر فهو تعدي في الآخر), بتثير غضبها جدًا هذه التعليقات باعتبار انها رافضة أي تعاطف مع هؤلاء المتظاهرين. ناس كتير من من هم ضد المظاهرة في حالة الغضب دي بتطلع منهم عبارات زي "ما تموتوهم و طز في حقوق الإنسان" أو "عايزين نلغي حقوق الإنسان في مصر" أو "بنطالب المجلس العسكري انه يعتبر حقوق الإنسان ملغية" ... و كتير من الناس دي لما بحاول أتحاور معاها ببدأ بسؤال "انت متأكد من اللي انت قلته؟ يعني انت مش عايز تراجع كلامك؟" و تلاقيه يجاوب بثقة "أيوة!" , و بعد كدة لما أسأله "طب انت عاوز ايه بالضبط؟" , الإجابة تبقى في الأغلب حاجة بتتضمن "عايزين ناكل عيش" و "عايزين الأمن يرجع" و "عايزين استقرار" .. و من هنا بقى أقدر أقوله : انت بتناقض نفسك بشكل, معذرة, مضحك !

حقوق الإنسان لا تقتصر فقط على حق التعبير عن الرأي و حق التظاهر و حق الاعتراض, مع انهم جزء لا يتجزأ منها. العيش و الأمان دول كمان حقوق إنسان أساسية جدًا. يعني لو اعتبرنا حقوق الإنسان ملغية زي ما بعض الناس بتقول هيحصل الآتي (ملاحظة: مش هقولك انه هيبقى حق أي ضابط أو عسكري يتعدى عليك و يجرجرك في الأقسام بدون حجة لإن الكلام ده معادش يأثر في حد تقريبًا, مع انه وارد جدًا في حالة أعلننا الغاء حقوق الإنسان و لو ان ده مينفعش في أي بلد فيها بني آدمين) اللي هيصحل هو ان هيبقى من حق أي حرامي يكسر عليك باب الشقة و يدخل يقلب الشقة و يتعدى على ولادك و ممكن كمان على مراتك و يفضل محتل بيتكو لمدة أيام. ليه؟ لإن مفيش حقوق!! مفيش حقوق يعني انت ملكش حق في الأمن و لا في حماية أملاكك و لا نفسك و لا أهلك ليكو الحق انوك تتحموا من أي أذى !! يبقى نقول طز في حقوق الإنسان؟؟ و اللي هيحصل بردو انك تسيب عربيتك في حتة تلاقي حد خدها و مشي و مش من حقك تكلمه.. لإنك, اعذرني, هتبقى ساعتها زيك زي الحيوان ملاكش حق انك تقول انك بتملك العربية دي أصلًا !!

بالتالي يعني ايه حقوق الإنسان؟ حقوق الإنسان دي هي اللي بتفرق بينك و بين الحيوانات في المعاملة. بدون هذه الحقوق و القوانين التي تسن لحماية هذه الحقوق سنعيش في مجتمع غير آدمي, مجتمع أشبه بالغابة: البقاء فيه للأقوى !! يعني يا سيدي المحترم و سيدتي المحترمة, قبل ما تقولوا أي كلمة فكروا كويس ... فكروا 100 مرة انتو بتتكلمو عن ايه!!

الحرية هي أحد حقوق الإنسان الأساسية التي يجب احترامها؛ دي اللي بتفرق بين الحر و السجين. المجرم بنعاقبه بإننا نحرمه من حريته, و ده دليل على قد ايه الحرية مهمة للإنسان! و الحرية لا تتجزأ, يعني لإننا بشر مش حيوانات, حرية الحركة مش كفاية بالنسبالنا. احنا محتاجين حرية تعبير و حرية فكرية عشان احنا اصحاب عقول. و حرية التعبير اللي انت بتنتقدها هي دي اللي بتسمحلك إنك تتكلم و تقول اللي انت عايزه, حتى لو كانت جملة انت مش بتعنيها زي جملة "طز في حقوق الإنسان" !! فأرجوكم, محدش يكتب جمل زي دي من غير ما يقيمها كويس, و محدش يرفض حقوق الإنسان و الحرية لإنك نفسك مستفيد منها و انت نفسك لو اتاخدت منك بجد مش هتعرف تعيش !!

أشكرك على وقتك الثمين :)

ملحوظة: لو حد عايز يعلق ميكلمنيش عن المتظاهرين و الحالات الفردية و الأطراف الثالثة و المجمع العلمي لإن ده مش موضوعي و مش بحب أتكلم في أي حاجة في غير محلها ... أنا بتكلم عن عبارة الناس بتقولها أنا شايفاها "غريبة" إلى حد ما .. بس كدة :)

المساواة في الغرامة ... مش عدل

2011-11-29T13:03:00.000-08:00

!لما واحد من أغنى رجال فنلندا تعدى السرعة القانونية و هو سايق بعربيته ... أخد مخالفة بـ170 ألف يورو

و في واقعة تانية تم تغريم جوسي سالونجا اللي عنده 27 سنة, و هو وريث لأحد أغنى العائلات في فنلاندا مخالفة بقيمة 116 ألف

يورو لإنه كان سايق على سرعة 80 كم في الساعة في شارع السرعة القصوى فيه 40 كم في الساعة ..!

القصة دي أثارت إعجابي جدًا بالنظام في فنلندا! ناس كتير ممكن تعتقد ان ده جنون ... يعني ايه أدفع فوق الـ١٠٠ ألف يورو عشان سرعت شوية؟
أكيد لو ده حقيقي يبقى جنون رسمي، لكن الحقيقة انك انت لو كنت مكان الناس دي مكنتش هتتغرم نفس المبلغ ده... ليه؟ لإن فنلندا

بتتبع سياسة بتربط بين دخل الشخص و حجم الغرامة اللي بيدفعها في أي مخالفة للقانون بيرتكبها... يعني اللي دخله ألف يورو في الشهر غرامته هتبقى أقل بكتير من اللي دخله مية ألف يورو... لإن لو كان في غرامة ثابته الغرامة دي هتبقى عبء ثقيل جدًا و رادع للفقير، و شوية فكة هيدفعها و يرجع بيتهم و ممكن يدفعها ١٠٠ مرة ببساطة بالنسبة للغني! باختصار: عدالة !

العدالة في رأيي هي ان كل أفراد المجتمع من أغنياء و فقراء و أصحاب سلطة يبقوا عرضة للمحاسبة و العقاب لو ارتكبوا أقل غلطة أو مخالفة للقانون، يعني يبقوا كلهم سواء من ناحية ان كلهم هيتحاسبوا. طبعًا أنا صغيرة جدًا، مش سنًا بس لكن بمحدودية علمي، على انني أخلق مفهوم جديد للعدالة فخلينا نقول ان دي نظرتي المتواضعة للعدالة. زي ما قلت ان العدلة من كما أراها هو ان كل حد يتحاسب و يتعاقب لو أخطأ، لكن ان حجم العقاب يفرق حسب سن الشخص، و ظروف الشخص، و دوافعه لارتكاب اللي ارتكبه. يعني انا شايفة انه ظلم كبير انني أعاقب واحد فقير و بالعافية لاقي ياكل على السرقة بنفس عقوبة شخص غني عنده كل اللي محتاجه و بردو سرق!

يعني لو احنا متفقين اننا كلنا مختلفين عن بعض في مليون حاجة... ليه كلنا بنتعاقب بنفس الشكل في حاجات كتير؟

ده لينك فيه وقائع تانية من المخالفات الكبيرة في فنلندا (بمعنى انني مش بجيب كلام من عندي): http://news.bbc.co.uk/2/hi/business/3477285.stm

عارفة ان البوست ده على قده أوي و مفيهوش ابداع بس ده مجرد حاجة قرأت عنها و حبيت أوريهالكم
.
.
.
و شكرًا :)
.
.

A Night in the Streets Cairo ... Thoughts...

2011-06-30T13:32:00.000-07:00

Every time I look at the streets of Cairo, I can't help notice but one thing: the great speed at which everyone seems to be going! All the people, whether on foot or in vehicles, seem to be moving really quick, like they're in a hurry, a great hurry! Everybody seems to be on this race… a race with nothing, and for nothing! And why I say it is a race for nothing is because of this: while speed might be positive in certain circumstances, it seems completely meaningless and ineffective here; because if you zoom out a little to look at this entire nation, you'll see that it's completely static, that it has been settled in one dark position throughout decades of history!

--------------------------------------------

For history, for the records, tell us, people of Cairo, Where are you headed? Do you even know? People of Cairo, we need answers!

--------------------------------------------

Answers get lost in the middle of the loud and crowded Cairo traffic, but other questions rise: "People, why are you going so fast? If you're in a hurry… what are you in a hurry for?" Here, a different thought crosses one's mind: These people are not in a hurry! These people don't even know how fast they're going, and they don't seem to care to know either! These people are just pressing the paddle, pressing it as hard as they can; not because they're in a hurry, but because they're frustrated!

--------------------------------------------

Oh, frustrated people of Cairo, why don't you try to slow your lives down? Why don't you give your frustrated selves a chance they have been longing for: a chance to relax, and think?

--------------------------------------------

Think of the reasons behind your frustration, face them, and break out of the chains of stress! Poverty, oppression, discrimination and injustice, along with the demands of life… Could these be some of the reasons? And in addition to all these pressures, there are not even good sights in this country to cool down your hearts, calm your souls, or help relax your minds!

--------------------------------------------

Your minds, your voices, and your fists… These are the weapons God has given you! And you used them once! You used them to try to end poverty, oppression, discrimination and injustice; to put an end to a regime that represents all these cruelties! You started a battle against these cruelties, and you were winning… but you suddenly made a stop!

-------------------------------------------

A stop was the start of an attempt toward the revival of all what you have fought against… of all what many of you died to kill! And I know you can see it!! I know you can clearly see that oppression and injustice are still alive and are coming back!! And even when you try to look away toward the sunrise, you can still see their shadows in the horizon! Pick up your determination and get back to the field; go on with the battle that you have started, and never stop until oppression and injustice drop dead!! Once they're down, all other cruelties will follow!

-------------------------------------------

Follow the dream that you have conceived over eighteen days of fighting! Follow the trails of freedom, and you'll find freedom waiting for you!

--------------------------------------------

You, the people, are the hope! You are the key! You are your only savior! It's never over until you say it is, and I know that deep inside you, you know very well it's not over!

--------------------------------------------

Over the horizon, rays of light rise, and the sky starts turning to a delicate shade of pink. The streets have cleared up, the atmosphere is calm, and life has come back to its normal speed; but I know that's only for a while, until the race for nothings starts again! Soon, the sounds of horns and engines and the smell and color of smoke will fill the air! And I'll be waiting…Waiting for the day when all these people would stop, think, find answers, and pursue their dream for a better life!

درس في فن لفت الانتباه

2011-06-07T11:26:00.001-07:00

طبعًا محدش فينا يقدر يعيش مختفي و محدش واخد باله منه ... أكيد كل واحد فينا, و لو بين الحين و الآخر, بيبقى عايز الناس يلاحظوه و عايز يلفت انتباههم! لكن لفت الانتباه ده مش مسألة كدة بالسهال... يعني مش أي حد يعرف يلفت انتباه الناس بمنتهى البساطة كدة... لا لا لا... لفت الانتباه ده فن زيه زي الرسم و الشعر و الغنا و التمثيل ! و أنا عشان بنت حلال و طيبة هتكرم و أديكو درس نظري مبسط و مصغر في فن لفت الانتباه... و عفوًا مقدمًا !

نبدأ بسم الله بقى ..

شوف يا صديقي و شوفي يا صديقتي... هتلاقي ناس كتير تطلع تقولك "الفت انتباه الناس ليك بذكائك و ثقافتك و أخلاقك العالية و إبداعك" و لوك لوك لوك ! سيبك انت م الكلام الفاضي اللي ملوش معنى ده و ركز معايا و أنا أقولك اللي بيجيب نتيجة بجد !

الدرس بتاعنا هناخده حتة حتة كدة عشان محدش يتوه مني في النص بقى و يقوللي "معلش, مفهمتش!" و الكلام السئيل ده فركزوا كويس بقى و صحصحوا معايا شوية ! .... ميرسي !

أولًا... ستايلك !
لو عايز تلفت نظر الناس ليك المفروض ستايلك يبقى يونيك ... أيوة هي unique دي! يعني ستايلك يخلي الناس تاخد بالها منك حتى لو انت واقف وسط مليون بني آدم ! ... حد هيسألني: ازاي طيب؟ ... هقوله: ما هو لو كنت صبرت شوية يا فالح كنت لقيتني قولتها ! محدش بقى يقاطعني تاني...
للبنات: البسي حاجة منورة و بتلمع كدة !! و يا سلام بقى لو مليانة ترتر ... لما النور هينعكس على لبسك هتبقي و لا الإعلانات النيون ... حاجة تشرح القلب يعني ! و ادي دقني لو محدش خد باله من لبسك ! و كمان إديها لبس ضيق ... و مش أي ضيق ... ضيق جدًا لدرجة انه خلاص هيتقطع ... مش مهم انتي وزنك كام المهم تلبسي حاجة ضيقة ضيقة ... ممكن تخنقك, بس معلش لفت الانتباه يستاهل... مش كدة بردو؟.. شعرك بقى مينفعش تسـيبيه كدة عادي و لا تلميه عادي حتى... انتي تصبغيه لون يخلي دماغك تنور... أصفر (بس مش أي أصفر... أصفر منور و ملعلع كدة), بورتشقاني, أحمر... ممكن أزرق, و ممكن كذا لون في بعض كمان... و تسريحتك تبقى حاجة ضخمة كدة... ممكن تتقل دماغك بس تعالي على نفسك شوية! و لو انتي محجبة البسي بلوزة كات أو نص كم و البسي تحتيها الكارينا اللي لون الجلد ده... و أنا عن تجربة شخصية بقولك أهو انه بيلفت النظر جــــــــدًا !! و لو محجبة بردو ركزي جدًا ع الإشارب! لفة الإشارب لازم تكون حاجة زي بيقولوا كدة exotic ! حد هيسألني exotic ازاي يعني؟ هقوله: لو حد قاطعني تاني و الله لاسيبلكو الدرس ده و أمشي ! القصد ان لفة الإشارب بتاعتك متبقاش لفة اشارب عادية (و عارفة ان ناس كتير لما هتقرأ "لفة" هييجي ف بالها مخدرات, بس ما علينا ! ) يعني بدل ما تستعملي إشارب متر... استعملي مترين... تلاتة... عشرة !! و خلي القماش يلف دماغك لحد ما حجم دماغك يتضاعف 10 مرات ع الأقل ! و لو معندكيش قماش كتير أو قماش طويل ... حطي توكة كبيـــــــــــــــــــــرة, و بـ"كبيرة" أنا أقصد كبيــــــــــــــــــــــرة مش كبيرة, تحت الإشارب... و لو معندكيش توكة كبيرة و مش قادرة تشتري توكة كبيرة حطي توك صغيرة كتيـــــــــــــرة !! كتري من الاكسسوارات قد ما تقدري...و قد ما تقدري البسي اكسسوارات بتلمــــع! أما عن المكياج... لما تيجي تحطي مكياجك انسي حاجة اسمها ألوان طبيعية ... دي للناس اللي عايزة تتدارى! استعملي ألوان مبهجة و ملفتة للنظر... ممكن مثلًا المكياج اللي فوق عينك يبقى لون البلوزة؟؟ و لما تحطيه غطي بيه كل منطقة العين متسيبيش نقطة من غير ما تلونيها ... كأنك بتلوني لوحة فنية ! الروج طبعًا موصيكيش, يبقى لون مبهر كدة .. يعني أحمر مشع... بمبي مضيء... فاهمة ازاي؟ طب كويس ! و ممكن بردو بدل مكياج ملعلع تقضيها غوامق... بتلفت النظر بردو! يعني أحمر خدود اسود (شوفتو التناقض؟!) و كحل اسود و فوق عيونك اسود هيظبطوكي !

نيجي بقى للشباب: الشباب بردو ممكن يلبسوا لميع على فكرة ... احنا بندعم المساواة... مفيش فرق بين الرجل و المرأة ! و لو مش عاجباك فكرة اللميع, بلاااااش يا سيدي و لا تزعل نفسك ... ممكن تعمل زي تمورة و تقفل بس آخر زرارين من القميص و لو الموضوع مش ملفت كفاية تلبس سلسلة بتلمع عشان الناس تاخد بالها! و أوعى تقوللي ان تمورة مش ملفت للنظر... ده فيه بنات بيجروا وراه زي الـ......................بنات اللي بيجروا ورا تامر حسني... احححم ! و بنطلونك يا إما يبقى واسع أوي أوي أوي يا يبقى ضيق أوي أوي أوي, مفيش في النص !! ... و أقدم trick في كتاب "فن لفت الانتباه" هي إنك تسقط البنطلون و البوكسر يبان, و لو بنطلونك عادي أوي يبقى اختار بوكسر يكون ملفت للنظر ... ممكن بوكسر spongebob مثلًا؟؟ (لا دي مش من خيالي ... دي شوفتها قبل كدة!) ... شعرك لازم يبقى حكاية يتحكى بيها كل اللي يشوفوك! ممكن تطوله شوية و تروح مخلص عليه علبة الجل أو الـhair spray عشان توقفه كله لفوق يبقى ارتفاعه ع الأقل سبعة سنتي فوق دماغك ! و ممكن بردو تطول شعرك شوية كمان و تحمله بالسشوار و تدهنه جل و يبقى ليس و لميع و قمور !!!

2 – طريقة كلامك ...
طبعًا لو انت عايز تلفت انتباه اللي حواليك لازم طريقة كلامك متبقاش زي باقي الناس... لازم تبقى مميزة ! يعني ممكن مثلًا تدي تكة زيادة في الكلام ... يعني بدل ما تقول "مش عارف" ... تقول "ميش عيرف" ! بسيطة جدًا مش كدة؟ ... هي في الأول لما بتفتعل طريقة الكلام بتبقى صعبة لكن بعد شوية هتاخد ع الموضوع و هتبقى طالعة طبيعية جدًا و لا عصير البرتقان الـفريش ! و دايمًا خلي صوتك عالي... عاااااااااالي !

3 – انفعالاتك و ردود أفعالك...
انفعالاتك و ردود أفعالك لازم تبقى زي البلوزة ام ترتر اللي قولت عليها في الأول لو زودت عليها كمان صوت و حركة ! يعني تبقى رجل أو مرأة extreeeeme ! ضحكتك العادية انساها... أو ركبلها amplifier بمعنى أصح! البنات بردو يركبوا amplifier لضحكتهم بس يخلوها مسرسعة شوية ف نفس الوقت (عارفة ان في ناس بتضحك كدة طبيعي... دول استثناء... مش قصدي أجرح في حد و الله) . أما بقى ردود الأفعال التانية, الحزينة منها و السعيدة, لازم انفعالك فيها يبقى ع الأقل ضعفين انفعال الناس التانية !! يعني لو شوفت فيلم حزين مع أصدقاءك... لو لقيت عيونهم دمعت... تقوم تعيط زي العيال الصغيرة, و دموع بقى و نحيب و الجو ده ! و لو مثلًا حد جابلك هدية... مش تبتسمي و تقولي شكرًا و الحركات التعبانة دي... لأ انتي عايزة تلفتي الانتباه... تعملي ايه بقى؟ أول حاجة تدي واحدة "أووووه مااااااااي جااااااااااااد" ! بصرخة كدة و بعديها اقعدي صرخي ربع ساعة مثلًا زي المجنونة و اقعدي قولي ثااااااانك يوووووو ثانك يوووووووو ! و انتي بتصرخي بردو... و يا سلام لو عرفتي تفعصي عينك و تنزلي كام "دمعة فرحة" كدة... تبقى مسك الختام ! و لو مثلًا اتعورت أي تعويرة ان شا الله خدشة ... اشتغل في الدراما كأنك خدت رصاصة ف صدرك ( بعد الشر عليك يعني) ... زعيق و آهات و بتاع ... موصيكش بقى!و لو انت ع النت بردو ردود أفعالك تبقى زي ما قولتلك بس شيل منها عنصر الصوت... يعني
الـميرسي تبقى ميــــــــــــــــــــــــــرســــــــــــــــــــــــــــــــــــــي .. و ازيك تبقى ازاااااااااااياااااااك و كل كلمة تكتبها تبقى بنفس الشكل و إدي في الإموشنز بقى !

كدة أبقى أنا اديتك المفاتيح الأساسية جدًا لفن لفت الانتباه (You're Welcome ) ... لو عايز تعمق أكتر في التفاصيل يبقى خدها من خبراء لفت النظر... ما أنا إلا معلمة متواضعة بالنسبة ليهم !

لكـــن... قبل ما تمشوا لازم أنبه على حاجة... اللي قولتلكو عليه في الدرس ده حاجات فعلًا بتلفت انتباه الآخرين, لكن مش بالضرورة بشكل إيجابي! دي مجرد أسهل طرق تلفت بيها نظر الناس للحظات, و ممكن ينسوك بعد كدة!

و لو خدت بالك... كل ما درسناه في هذا الدرس عن أمور سطحية : الستايل, طريقة الكلام, الانفعالات... لإن طموح سطحي زي مجرد لفت انتباه الناس, لا يسعى إليه إلا من هو سطحي... و لا يناله إلا بطرق سطحية !

لو عايز أكتر من انتباه الناس... لو عايز احترام... لو عايز تسيب علامة ... يبقى امشي ورا كلام الناس اللي بتقول "الفت انتباه الناس ليك بذكائك و ثقافتك و أخلاقك العالية و إبداعك" ... أي نعم في ناس كتير ذكية و مبدعة و مثقفة في الدنيا دي مش بتلاقي الاهتمام و التقدير الكافي, لكن ع الأقل الناس دي اللي يعرفهم هيفتكرهم بكل ما هو حسن !

و على فكرة لو أي حد بيعمل أي حاجة م الحاجات اللي قولت عليها بشكل طبيعي... أنا تاني بأكد انني مش قصدي أجرح أو أتريق على حد!

بحبكو كلكو !! (تخيل انني بقولها زي سوما العاشق)
.
.
.
و شكرًا J

قصيدة: إرادة الحياة - أبو القاسم الشابي

2011-05-09T11:38:00.000-07:00

أعتقد القصيدة دي مبقاش في حد تقريبًا مش عارف أول بيتين منها (و اللي هما كمان جزء من النشيد الوطني التونسي) , لكن كمان أعتقد ان مش كل حد قرأها كلها ... أنا حطاها لإنني أعتقد إنها فعلًا قصيدة رائعة و أتمنى كل حد يقرأها

إرادة الحياة
لأبو القاسم الشابي

إذا الشّعْبُ يَوْمَاً أرَادَ الْحَيَاةَ ...... فَلا بُدَّ أنْ يَسْتَجِيبَ القَدَر
وَلا بُدَّ لِلَّيْلِ أنْ يَنْجَلِي ....... وَلا بُدَّ للقَيْدِ أَنْ يَنْكَسِر
وَمَنْ لَمْ يُعَانِقْهُ شَوْقُ الْحَيَاةِ ...... تَبَخَّرَ في جَوِّهَا وَانْدَثَر
فَوَيْلٌ لِمَنْ لَمْ تَشُقْهُ الْحَيَاةُ ...... مِنْ صَفْعَةِ العَدَم المُنْتَصِر
كَذلِكَ قَالَتْ لِيَ الكَائِنَاتُ ...... وَحَدّثَني رُوحُهَا المُسْتَتِر
وَدَمدَمَتِ الرِّيحُ بَيْنَ الفِجَاجِ ...... وَفَوْقَ الجِبَال وَتَحْتَ الشَّجَر
إذَا مَا طَمَحْتُ إلِى غَايَةٍ ...... رَكِبْتُ الْمُنَى وَنَسِيتُ الحَذَر
وَلَمْ أَتَجَنَّبْ وُعُورَ الشِّعَابِ ...... وَلا كُبَّةَ اللَّهَبِ المُسْتَعِر
وَمَنْ لا يُحِبّ صُعُودَ الجِبَالِ ...... يَعِشْ أَبَدَ الدَّهْرِ بَيْنَ الحُفَر
فَعَجَّتْ بِقَلْبِي دِمَاءُ الشَّبَابِ ...... وَضَجَّتْ بِصَدْرِي رِيَاحٌ أُخَر
وَأَطْرَقْتُ ، أُصْغِي لِقَصْفِ الرُّعُودِ ...... وَعَزْفِ الرِّيَاح وَوَقْعِ المَطَر
وَقَالَتْ لِيَ الأَرْضُ - لَمَّا سَأَلْتُ : ...... " أَيَا أُمُّ هَلْ تَكْرَهِينَ البَشَر؟"
"أُبَارِكُ في النَّاسِ أَهْلَ الطُّمُوحِ ...... وَمَنْ يَسْتَلِذُّ رُكُوبَ الخَطَر
وأَلْعَنُ مَنْ لا يُمَاشِي الزَّمَانَ ...... وَيَقْنَعُ بِالعَيْشِ عَيْشِ الحَجَر
هُوَ الكَوْنُ حَيٌّ ، يُحِبُّ الحَيَاةَ ...... وَيَحْتَقِرُ الْمَيْتَ مَهْمَا كَبُر
فَلا الأُفْقُ يَحْضُنُ مَيْتَ الطُّيُورِ ...... وَلا النَّحْلُ يَلْثِمُ مَيْتَ الزَّهَر
وَلَوْلا أُمُومَةُ قَلْبِي الرَّؤُوم ...... لَمَا ضَمَّتِ المَيْتَ تِلْكَ الحُفَر
فَوَيْلٌ لِمَنْ لَمْ تَشُقْهُ الحَيَاةُ ...... مِنْ لَعْنَةِ العَدَمِ المُنْتَصِر!"
وفي لَيْلَةٍ مِنْ لَيَالِي الخَرِيفِ ...... مُثَقَّلَةٍ بِالأَسَى وَالضَّجَر
سَكِرْتُ بِهَا مِنْ ضِياءِ النُّجُومِ ...... وَغَنَّيْتُ لِلْحُزْنِ حَتَّى سَكِر
سَأَلْتُ الدُّجَى: هَلْ تُعِيدُ الْحَيَاةُ ...... لِمَا أَذْبَلَتْهُ رَبِيعَ العُمُر؟
فَلَمْ تَتَكَلَّمْ شِفَاهُ الظَّلامِ ...... وَلَمْ تَتَرَنَّمْ عَذَارَى السَّحَر
وَقَالَ لِيَ الْغَابُ في رِقَّةٍ ...... مُحَبَّبَةٍ مِثْلَ خَفْقِ الْوَتَر
يَجِيءُ الشِّتَاءُ ، شِتَاءُ الضَّبَابِ ...... شِتَاءُ الثُّلُوجِ ، شِتَاءُ الْمَطَر
فَيَنْطَفِىء السِّحْرُ ، سِحْرُ الغُصُونِ ...... وَسِحْرُ الزُّهُورِ وَسِحْرُ الثَّمَر
وَسِحْرُ الْمَسَاءِ الشَّجِيِّ الوَدِيعِ ...... وَسِحْرُ الْمُرُوجِ الشَّهِيّ العَطِر
وَتَهْوِي الْغُصُونُ وَأَوْرَاقُهَا ...... وَأَزْهَارُ عَهْدٍ حَبِيبٍ نَضِر
وَتَلْهُو بِهَا الرِّيحُ في كُلِّ وَادٍ ...... وَيَدْفنُهَا السَّيْلُ أنَّى عَبَر
وَيَفْنَى الجَمِيعُ كَحُلْمٍ بَدِيعٍ ...... تَأَلَّقَ في مُهْجَةٍ وَانْدَثَر
وَتَبْقَى البُذُورُ التي حُمِّلَتْ ...... ذَخِيرَةَ عُمْرٍ جَمِيلٍ غَبَر
وَذِكْرَى فُصُول ٍ ، وَرُؤْيَا حَيَاةٍ ...... وَأَشْبَاح دُنْيَا تَلاشَتْ زُمَر
مُعَانِقَةً وَهْيَ تَحْتَ الضَّبَابِ ...... وَتَحْتَ الثُّلُوجِ وَتَحْتَ الْمَدَر
لَطِيفَ الحَيَاةِ الذي لا يُمَلُّ ...... وَقَلْبَ الرَّبِيعِ الشَّذِيِّ الخَضِر
وَحَالِمَةً بِأَغَانِي الطُّيُورِ ...... وَعِطْرِ الزُّهُورِ وَطَعْمِ الثَّمَر
وَمَا هُوَ إِلاَّ كَخَفْقِ الجَنَاحِ ...... حَتَّى نَمَا شَوْقُهَا وَانْتَصَر
فصدّعت الأرض من فوقها ...... وأبصرت الكون عذب الصور
وجاءَ الربيعُ بأنغامه ...... وأحلامهِ وصِباهُ العطِر
وقبلّها قبلاً في الشفاه ...... تعيد الشباب الذي قد غبر
وقالَ لَهَا : قد مُنحتِ الحياةَ ...... وخُلّدتِ في نسلكِ الْمُدّخر
وبارككِ النورُ فاستقبلي ...... شبابَ الحياةِ وخصبَ العُمر
ومن تعبدُ النورَ أحلامهُ ...... يباركهُ النورُ أنّى ظَهر
إليك الفضاء ، إليك الضياء ...... إليك الثرى الحالِمِ الْمُزْدَهِر
إليك الجمال الذي لا يبيد ...... إليك الوجود الرحيب النضر
فميدي كما شئتِ فوق الحقول ....... بِحلو الثمار وغض الزهر
وناجي النسيم وناجي الغيوم ...... وناجي النجوم وناجي القمر
وناجي الحياة وأشواقها ...... وفتنة هذا الوجود الأغر
وشف الدجى عن جمال عميقٍ ...... يشب الخيال ويذكي الفكر
ومُدَّ عَلَى الْكَوْنِ سِحْرٌ غَرِيبٌ ...... يُصَرِّفُهُ سَاحِرٌ مُقْتَدِر
وَضَاءَتْ شُمُوعُ النُّجُومِ الوِضَاء ...... وَضَاعَ البَخُورُ ، بَخُورُ الزَّهَر
وَرَفْرَفَ رُوحٌ غَرِيبُ الجَمَالِ ...... بِأَجْنِحَةٍ مِنْ ضِيَاءِ الْقَمَر
وَرَنَّ نَشِيدُ الْحَيَاةِ الْمُقَدَّسِ ...... في هَيْكَلٍ حَالِمٍ قَدْ سُحِر
وَأَعْلَنَ في الْكَوْنِ أَنَّ الطُّمُوحَ ...... لَهِيبُ الْحَيَاةِ وَرُوحُ الظَّفَر
إِذَا طَمَحَتْ لِلْحَيَاةِ النُّفُوسُ ...... فَلا بُدَّ أَنْ يَسْتَجِيبَ الْقَدَرْ
.
.
.

عزبة البيه الديكتاتور

2011-04-28T23:43:00.001-07:00

واحدة من فترة (بعد التنحي بأسبوعين و لا حاجة) قالتلي: بس أنا بردو شايفة إن الناس عايزالها حكم ديكتاتوري عشان يلمهم..

الكلمة دي بصراحة أثارت اشمئزازي (حلو التعبير ده) بشكل لا يوصف... بجد حسيت بقرف لما سمعتها !

أول حاجة جت في بالي هي: ايه اللي يدي الحق لشخص واحد بعقل شخص واحد و فكر شخص واحد و قدرات شخص واحد إنه يتحكم في آلاف أو ملايين الأشخاص؟

و كلمة "يلمهم" دي كمان ليها شأن تاني! لما تقول "يلمهم" دي تبقى انت بتتكلم على ناس و لا على غنم؟

لكن هو ده فعلًا المنطق اللي بيتعامل بيه الحكم الديكتاتوري مع المواطنين... سوري مع الرعايا, لإنه لا مواطنة في الدولة الديكتاتورية : انهم غنم! أكلهم علف (و لا متأكلهمش مش فارقة) و ابنيلهم أي خرابة يعيشوا فيها (أو متبنيلهمش سيبهم عايشين في الشارع, بردو مش فارقة!)... و ف كل عيد يدبحولهم كام واحد من الغنم دول عشان يخلصوا منهم! بس الفرق ان في مزرعة الديكتاتور الغنم ممنوع يصدر أي صوت و ممنوع حتى يرفس... إلا لو البيه الديكتاتور قاله يعمل كدة طبعًا! و لو البيه الديكتاتور طلب من غنمة من دول انها تقف على ايديها لازم تقف على ايديها, و لو فشلت تتقطع رجليها و لو رفضت بقى تتاخد و تتسلخ و هي عايشة و لآخر عمرها ماتشوفش النور!

و كمان في مزرعة الديكتاتور, أو خلينا نقول عزبة الديكتاتور لإنهم بيحولوا الدول إلى عزب, الغنم ممنوع يتمشى حوالين العزبة براحته... كمان يتمشى؟! مش كفاية ان احنا مأكلينهم و مشربينهم هما هيبرتعوا و لا ايه؟ اه صح, هما هيبرتعوا و لا ايه؟! عزبة البيه هي و لا عزبتهم؟ لازم "يتلموا"! و كمان يقوم البيه زارع وسط قطيع الغنم ده كام تعبان من بتوعه متنكرين على شكل غنم عشان يتجسسوا ع القطيع و ينقلوله الأخبار أول بأول و يقولوله مين معاه و مين ضده (و ده بيحصل في كل الديكتاتوريات لإن عادة الديكتاتور مبيثقش ف شعبه, سوري غنمه, و عارف انهم مش هيبقوا طايقينه فبيبقى خايف منهم)... و لو غنمة ف يوم م الأيام الشيطان وزها و قلت بعقلها و فكرت تشغل مخها شوية و حست إن في حاجة غلط و لازم تتصلح في العزبة (اللي هي البلد) يبقى نهارها و نهار أبوها إسود!! و كمان لو نقلت الرسالة دي لكام غنمة تانيين و خلتهم يفتحوا مخهم معاها ساعتها تبقى آخر مرة يتسمع فيها عنها و عن الكام غنمة اللي معاها. عند البيه في قواعد و قوانين تنظم عملية تشغيل المخ: أ- تشغل مخك لما البيه يحبك تشغل مخك مش لما انت تحب تشغل مخك... ب- تشغل مخك في حاجات معينة و حاجات تانية أوعى تفكر فيها و لا تتمعن و طنش لما تيجي سيرتها و لا كإنك سامع حاجة! ج- المفروض كمان لما تيجي سيرتها تبلغ ع اللي جاب سيرتها للبيه عشان يتصرف معاه بمعرفته.

مش من حقك تقول لأ, مش من حقك تتكلم في اللي تحبه وقت ما تحب, و تطيع و تاخد فوق دماغك غصب عنك و تسكت!... و بكدة, تبقى انت فقدت حريتك و كرامتك في وقت واحد... و لما تفقد حريتك و كرامتك في وقت واحد تبقى اتجردت من جزء كبير جدًا من إنسانيتك و بقيت غنمة في قطيع من الغنم! و البيه الديكتاتور هو البني آدم الوحيد في العزبة و كإن ربنا مخلقش بشر غيره! و كإنه هو الوحيد اللي عنده عقل و فكر في البلد! و كإن هو "كائن" مقدس غير كل الناس اتخلق عشان "يلم" باقي البشر! و كإن الدولة اتخلقت عشان تكون ملك لسعادته!

الناس مش غنم! الناس دول ليهم حقوق و ليهم كرامة و ليهم عقول لازم تراعوها! الناس دول كمان كل واحد فيهم ليه الحق في الحكم زيك بالظبط... زيك ياللي قاعد في الكرسي و مربع و شايف انك انت "المخلوق المقدس" اللي ربنا مخلقش زيه في البلد..

و البلد مش ملك لشخص! البلد ملك لكل أهلها و ليهم حقوق فيها لازم ياخدوها!

اللي يستبيح كرامة الناس و يحاول يفني عقولهم مش بعيد أبدًا عليه يستبيح أعراضهم و دمائهم لإنهم بالنسباله معادوش بشر, و يمكن كمان من الأصل هو مبيعترهمش بشر!

قد تكون هناك نسبة من الناس فعلًا تفتقر إلى بعض التحضر, ماشي! لكن في قانون يسري على الجميع... لو انت طبقت القانون صح و من غير تمييز كل الناس هتمشي عليه... و لما نقول من غير تمييز يعني القانون يطبق على كل حد بلا استثناء و لو في عقوبات يبقى تطبق على كل الناس بنفس الشكل, بما فيهم رئيس الدولة نفسه! لو انت ربيت الناس في الدولة على احترام القانون هيحترموه! لو انت خلقت مناخ ينفع يطبق فيه القانون صح كل ده هيحصل!

و لو هتكلم على حالة دولة زي مصر, فيها فئة ضخمة تفتقر إلى التحضر و فئة كبيرة غير متعلمة... ايه اللي خلق الفئة دي؟ هل الناس دي ذنبها انها بقت كدة؟ هل كان في قانون يطبق بشكل صحيح من الأساس و الناس دي راحت مع نفسها خالفته؟ ... اللي بيتولد في مدينة, بيعيش بقانون المدينة... و اللي بيتولد في غابة, بيعيش بقانون الغابة! و احنا كنا عايشين في ظل نظام حول المدينة إلى غابة, فحتى اللي اتولد في المدينة و عاش فترة بقانون المدينة, فجأة لقى نفسه ف غابة و كان لازم يعيش بقانون الغابة غصب عنه و مش بمزاجة! و حتى لو اتخلقت فئة في الفترة اللي فاتت تريد مخالفة القانون فقط لمخالفة القانون, فئة توصف بالكلمة الانجليزية: deviant, فبردو اللي خلق الفئة دي عوامل كتير أوي خارج إرادتهم من كرههم للسلطة المتمثلة بالنسبالهم في القانون إلى الشعور بالكبت إلى مشاكل اجتماعية عانوا منها سببتها مشاكل اقتصادية و سياسية و خلافه إلى حاجات تانية كتيرة جدًا.

لكن الحل ما زال مش إن انت تعامل الناس دول على إنهم غنم و تعاملهم بشكل مختلف عن باقي الناس لإن ساعتها هيبتدوا فعلًا بسبب شعورهم بالتمييز يتعمدوا انهم يخرجوا عن القانون بالعند فيك... الحل هو زي ما قولت سابقًا: تبتدي تطبق القانون بالشكل الصحيح و تفرضه على كل من في الدولة بلا استثناء, و ساعتها الصغير قبل الكبير هيخضع للقانون و يحترمه...

و خلوني كمان ألفت النظر لإن السيادة في الدولة الديكتاتورية ليست للقانون, بل هي للحاكم الذي يضع القانون بالشكل الذي يتناسب معاه ليستطيع أن يفرض سلطته الكاملة على الشعب! و لما السيد الحاكم يمسك الدستور و يظبطه و يعدله و يذوقه بالشكل اللي يليق مع سعادته, يبتدي يتغنى بسيادة القانون و الدستور... لكن مش أي قانون و لا أي دستور, بل قانونه هو و دستوره هو!

و بقولها تاني... الناس مش محتاجة تتلم! الناس محتاجة يترسملها طريق واضح تمشي عليه... طريق فيه مساحة للحرية و الإبداع... الناس كمان ليها حق انها تفهم ايه اللي بيحصل من حواليها, و لو هتفرض حاجة عليهم لضرورة ما لازم تفهمهم ايه الضرورة دي و تشرحلهم الموقف لإن ده حقهم ! الناس محتاجين يتعاملوا على انهم بشر و أصحاب عقول! الناس محتاجين انهم يتعاملوا على إنهم مواطنين مش رعايا! الناس محتاجين يحسوا إن الوطن ده فعلًا ملكهم و إن كل حاجة بيعملوها هتأثر على مستقبل البلد...

و في النهاية بقولها, لا للحكم الديكتاتوري المستبد اللي بيميز البشر عن بعضهم, و لا للقمع و لا للتمييز و لا لاستباحة كرامة البشر!

و شكرًا :)

نعم ! إنها المؤامرة !

2011-04-27T12:50:00.000-07:00

و بالنسبة لنظرية المؤامرة اللي بقت زي الوباء, أحب أطرح وجهة نظري في هذا الشأن...
عارف انت لما أجيب طبخة حلوة أوي أوي بس أروح مقدمهالك كل يوم على مدار أربع شهور... أربع شهور و انت مبتاكولش حاجة غير الوجبة دي... و عشان أزيد الطين بلة بقى مقدمتلكش الوجبة زي ما هي,لا ده أنا كمان لاعبة في المقادير...
تخيل انت كدة الموقف... ايه هيكون إحساسك و ردة فعلك؟ أعتقد ان الوجبة دي, حتى لو كانت من وجباتك المفضلة سابقًا, هتكرهها للأبد و لو شميت ريحتها في أي مكان بعد كدة هتسيب المكان و تمشي
طبعًا ده مثال للتصوير و أكيد نظرية المؤامرة مش طبخة ... و لو انها ليه علاقة بالـ"تطبيخ", بس ما علينا ..

الفكرة تكمن (بحب تكمن دي أوي) في إن نظريات المؤامرة كلها في الأساس مبنية على حاجات حقيقية و على أساس واقعي, لكن للأسف زيها زي حاجات كتير في عالمنا (اللي مبقاش باينله وش من قفى) تحولت من نظرية أو فكرة لها أساس واقعي إلى كارت بيستعلمه ناس معينين في ظروف معينة لأغراض معينة (قد تكون الأغراض إثبات وجهة نظر أو التضليل أو التخويف أو حاجات تانية كتير أوي) و للأسف كمان الكارت ده ابتدى يتحرق . و بسبب الاستهلاك البشع ده الفكرة بقت تكاد تفقد معناها... بقت شبه ماسخة (زي شبه جزيرة, اللي هي مش جزيرة أوي) ... و بقت كل حاجة في الدنيا بتحصل بتتربط بالمؤامرة و بالذات في الفترة الأخيرة
يعني أنا هدي مكافأة للي يجيبلي حاجة واحدة حصلت في مصر الناس مربطتهاش بالمؤامرة, و بالذات المؤامرة الخارجية (أيوة, هي الأجندات)
أنا مش بقول ان كل النظريات دي غلط, أكيد بتكون صحيحة في أوقات كتير... بس أنا بتكلم على حالة كاملة ...
في ناس بقت مؤمنة بنظرية المؤامرة كإنها قاعدة الجاذبية: أي إنها موجودة ف كل وقت في كل مكان على سطح الأرض, و إن بين أي جسمين في الكون في طاقة مؤامرة... سوري, جاذبية
و أقرب مثال أيام الثورة... أعتقد مصر كانت ضدها مؤامرة أمريكية-إسرائيلية-قطرية-أيرلاندية-سويسرية-صربية-جنوب أفريقية-إيرانية-بلجيكية باين؟ ... حاجة كدة
و لو هنرجع لقبل كدة, و آسفة إنني هرجعكوا لذكرى منحبش نفتكرها, اللي حصل في السودان بين جمهور مصر و الجزائر... طبعًا مستحيل نفترض إن دي واقعة شغب زي حاجات كتير حصلت قبل كدة و في فئة غير متحضرة سببتها... كلا و ألف كلا! لا لازم نفترض إنها مؤامرة منظمة ليس فقط من الجزائر و السودان بل دخل فيها أطراف كتير تانية من دول عربية و الفيفا بردو طلعوها جزء م المؤامرة على ما أتذكر ... و بوظنا علاقتنا مع دولة عربية شقيقة بسبب ماتش كورة و الحمدلله على كل حال...
و في الشهر الآخراني ده اسمها مبقاش مؤامرة... بقوا بيسموها... ثورة مضادة؟ أيوة هي الثورة المضادة! و بقت أي حاجة تحصل في مصر تبقى ثورة مضادة! لو حصل ان أربع أشخاص مثلًا جالهم برد ف وقت واحد, و ده وارد, أكيد أكيد هتلاقي أكتر من شخص هيربط الموضوع ده بالمؤامرة سابقًا... اللي هي الثورة المضادة حاليًا ...
لكن اللي عايزة أعرفه ايه سبب الموضوع ده؟ ايه سبب ان الإيمان بنظرية المؤامرة بقى بالشكل ده؟ هل احنا عاوزين نطلع نفسنا مستهدفين من كل العالم؟ و لا عشان احنا لازم دايمًا نلاقي حد نرمي اللوم عليه؟
أنا شخصيًا مش عارفة الإجابة و أتمنى لو حد عنده الإجابة يفيدني بيها
.
.
و شكرًا :)

.
.

رد بسيط من إنسانة بسيطة ع اللي بيدافع عن مبارك

2011-04-26T07:40:00.000-07:00

أولًا خلوني أوضح حاجة قبل ما أبتدي كلام في الموضوع... أنا اسمي منة علي يعني أبويا اسمه علي ... ماسميش منة محمد حسني مبارك فهو مش أبويا ... (و أنا أسمع ان الرئيس السابق... سوري, المخلوع... عنده ولدين بس! و لا انتو عايزين تلبسوه قضية آداب؟)؟

تاني حاجة, لو أبويا حرامي و ظالم أنا هتبرا منه أساسًا و هبقى أول واحدة أقدمه للمحاكمة

تالت حاجة, لو راجل عجوز و عيان ارتكب جريمة سواء قتل أو سرقة,, هل ده يعفيه شرعيًا أو قانونيًا من انه يتحاكم؟ لأ !

رابع حاجة, هل "عجوز و مكحكح و عيان" دي الصفات اللي لازم يتحلى بيها رئيس دولة ؟ بردو لأ .. أكيد لأ !

خامس حاجة, الرئيس موظف حكومي الشعب بيعينه عشان يدير شؤون البلاد, لو قصر في واجبه يبقى ياخد فوق دماغه و اللي عينه من حقة يرفده و يحاسبه على أي خطأ و أو تقصير إرتكبه!

بس حبيت أوضح الحاجات دي عشان نبقى على نور...

و قبل ما أبدأ بقى بس هقولوكو السيستم بتاع الرد هيمشي ازاي... أنا هكتب كل جملة بتتقال في الدفاع عن مبارك (لا بارك الله في عمره و لا عمر أي ظالم) و تحتها ردي البسيط جدًا...

1- (الجملة الشهيرة جدًا) ع الأقل أيام مبارك كنا عايشين في أمان ... الواحد مكانش بيخاف لما ينزل يتخطف و لا يتقتل و لا يحصله أي مصيبة ...

حلو أوي انك كنت مبتخافش بجد من قلبي بحييك على شجاعتك... بس خليني أنقلك خبر عاجل قد يصدمك: مصر عمرها ما كانت أمان ! مش معنى إن انت و لا أهلك محصلكوش حاجة ان البلد كلها كانت زي الفل ! انما مصر معدل الجرائم فيها من زمان الله ينور! سرقة, اغتصاب, تحرش جنسي, قتل, خطف... كل دول كانوا موجودين و موجودين بكم غير طبيعي ...

في انفلات أمني؟ أيوة في إلى حد كبير جدًا, بس عدى ع الثورة 3 شهور و الأوضاع شوية شوية و هترجع لطبيعتها... لكن سبب الانفلات الأمني مش غياب مبارك... مش مبارك هو اللي كان ما شاء الله حريص أوي على أمن البلد يا عيني و لما مشي مبقاش في حد يظبط الدنيا مكانه. مبارك الأمان بالنسباله كان الكارت اللي بيساومكوا بيه و هو قالها بوضوح في خطابه, خيركوا ما بين "الفوضى و الاستقرار" , و الجملة دي مكانتش جملة "عفوية" من راجل "عفوي" بل هو تهديد واضح و صريح: "يا ترجعوا تعيشوا عيشة الكلاب يا هقلبلكوا الدنيا و آدي دقني ان ارتاح بالكو ثانية واحدة بعد كدة!"

و بصراحة في ناس بتبالغ مبالغة سخيفة في "عدم الأمان" اللي بقى موجود بعد الثورة, الأمان متعدمش... معدل الجرائم نسبة للمدة الزمنية ممكن يبقى هو سبب الإحساس إن البلد بقت كلها مجرمين, انما ده مش حقيقي! (غير ان الأمان كان شبه معدوم أصلًا في عهد مبارك) ...

و كمان لو بصينا ع الأمان و ربطناه بالنظام في عهد مبارك... مين اللي مهمته حفظ الأمان؟ وزارة الداخلية أو جهاز الشرطة لو هنبقى أدق... الشرطة كانت بتعمل ايه في عهد مبارك؟ و لو كان حصل انفلات أمني في عهد مبارك كانت الشرطة هتلم الموضوع؟ و لو حد جراله حاجة و استنجد بالشرطة كانت الشرطة هتسأل فيه؟ لو لسة متعرفش الإجابة خليني أسهلها عليك و أجاوبك:

أ – الشرطة في عهد مبارك كانت شبه صورية و مبتعملش حاجة غير انها تفتري ع المواطنين ( أهو... احمدوا ربنا بقى و اشكروا الثورة دلوقتي هتخافوا م الحرامي بس مش الحرامي و الشرطي... أي خدمة !). و حتى لو افترضنا الضمير و حسن النية في كل أفراد الشرطة, النظام كان بيعمل يا إما على قتل ضمير أفراد الشرطة أو على تيإيسهم من أداء واجبهم و تصعيب الأمر عليهم....

ب- لو كان حصل انفلات أمني ف عهد مبارك و الله ما كان حد سأل فيكوا و كانوا سابوكوا تتسرقوا و تتقتلوا و ممكن بس يطلعولهم كام بيان كله كلام فاضي يوعدوكوا بعودة الاستقرار و انهم "يعملون قصار جهدهم" لحفظ الأمن في مصر !

ج – شرطة النجدة بردو كانت منظر و لو كنت استنجدت بيهم في أي وقت كانوا هيطنشوك !

حلو؟ (آه حلو) ... ننقل ع اللي بعده

2- مش ذنب مبارك ... ده ذنب أحمد نظيف و حبيب العادلي و الوزارة الفاسدة!

بردو حلو أوي! طب مين اللي عين "الوزارة الفاسدة" يا حلوين؟ بابا مباااارك! مش كدة؟

طب ماااااشي... هنفترض انه يا عيني الراجل على نياته و مكانش عارف يا حبة عيني انهم فاسدين... مش قعدوا فوق العشر سنين في الوزارة؟ طول الفترة دي مبارك مقدرش يستنتج و يستنبط من أفعالهم انهم فاسدين؟ لو قلت لأ يبقى طريقنا سالكة ان شاء الله... لو قلت "آه" يبقى انت بتفترض حاجة من اتنين: 1- إن مبارك, لا مؤاخذة, حمار... 2- إنه مش متابع أحوال البلد!

لو 1 (أي إن مبارك حمار) ... يبقى سوري, احنا منقبلش حمير يحكمونا ...

لو 2 يبقى هو عديم المسؤولية و مش شايف شغله كرئيس و بالتالي لا يصلح انه يكون رئيس و كمان لازم يحاسب على طفريته في مسؤوليته !

3- مش ذنبه برده... اللي حواليه هما اللي كانوا مغميينه و مش بيوصلوله الحقيقة...

في هذه الحالة دعني أعلمك يا صديقي... أو صديقتي (اه غصب عنك هنبقى صحاب ) ... ان في الحالة دي انت عايز تقول ان مبارك بيستعبط؟

مغميينه ازاي يعني؟

احنا في القرن الواحد و العشرين .. مش في القرن العاشر لما الأخبار كانت بتتنقل من خلال الحمام الزاجل و هو معندوش واحدة!

أبسط حاجة يفتح أي جرنال و لا قناة تلفزيون و لا يفتح النت و لا ياخد بعضه و ينزل أي منطقة هيشوف الفساد معشش في كل ركن !

بردو مصمم على كلامك؟ طب ماشي خلاص يا سيدي أنا كمان هتفق معاك ان مبارك كان بيستعبط ! و بيستعبط يعني هو غير مسؤول مما يعيدنا لنقطة 2 في الفقرة اللي فاتت !

4- انتو ناس ناكرة للجميل! بقى بعد اللي الراجل عمله عشانكوا تعملوا فيه كدة؟

أنا شخصيًا لو هتكلم ع اللي مبارك عمله عشاني هو خلى ظروف المعيشة في مصر زي الزفت و الرواتب في الأرض مما دفع والدي لإنه يدور على شغل برة و آديني قاعدة هنا متشحططة في الغربة!!

أنا مش عايزة أتكلم عن نفسي بس بما انه سؤال قولت أرد عليه و مقدرش أتكلم بالنيابة عن حد...

المهم... من ناحية مبارك قدم ايه للبلد خليني أفكر.. همممم... الدائري اللي بتحصل فيه تلت أرباع حوادث مصر؟ صح, إنجاز !

اه اه افتكرت كمان, و ف عهده المخدرات ملت البلد و الزراعة و الصناعة تدهور حالهم و السياحة كمان بقت في الأرض و التعليم خيبة تقيلة و المستشفيات بقت اللي يدخلها بمرض يطلع بعشرة و بقى نص الشعب تحت خط الفقر و الرشاوي و المحسوبية ف كل حتة و كم مهول من الناس عايشة في عشوائيات و أراضي البلد اتباعت بتراب الفلوس و الغاز بتاعنا كان بيتصدر لإسرائيل تقريبًا ببلاش و إثيوبيا استقوت علينا و عايزة تقطع عننا النيل اللي هو اتنازل عن نصيب مصر فيه!! صح صح إنجازات أنا ازاي مخدتش بالي !!!

أما بقى عن ان هو "حارب" و "حرر مصر" في 1973... هو محاربش أولًا, قائد القوات الجوية بيقعد في غرفة العمليات مبيحاربش, معلومة جديدة عليك؟ طب كويس أبقى ثقفتك شوية ! تاني حاجة, هو شارك كقائد القوات الجوية ماشي و تاريخه العسكري قد يكون كويس ماشي... بس ايه علاقة ده بأي حاجة؟ نقدر إنجازاته؟ ده هو الوحيــــــد من اللي شاركوا في 6 أكتوبر اللي اتعملتله أغنية تتغنى بإنجازاته! (الأغنية السئيلة بتاعة "أول طلعة جوية"... فاكرينها؟ و أساسًا القوات الجوية مش هي اللي حسمت الحرب على فكرة !!) ... و لو انتو ناس مقدرة للإنجازات كدة كنتو إنتقدتوا مبارك عشان حاول يمحي تاريخ شخص عظيم زي سعد الدين الشاذلي أو ع الأقل كنتو اتحمقتوا أوي على إن حد عظيم زيه متكرمش على إنجازاته في الحرب... و لو مش عارفين مين سعد الدين الشاذلي, يبقى انتو و لا تعرفوا أي حاجة عن حرب 1973 و ساعتها مش المفروض تتكلموا أساسًا عن أي إنجازات في الحرب!

5- ده رمز مصر و اللي يهينه يبقى بيهين مصر...

دي هرد عليها في شكل نقاط...

أ- مين اللي فتى الفتوى المتخلفة بإن الرئيس رمز لأي دولة في التاريخ؟! و هو ايه اللي خلى حسني مبارك رمز أساسًا كان العلم و لا الأهرامات مثلًا؟! الرئيس زي ما قولت سابقًا موظف حكومي ... على كدة كل الموظفين الحكوميين رموز لمصر؟

ب- أنا متفقة على انه الشتيمة غلط عمومًا ... بس اللي بيشتم أي حد و أي حاجة طول اليوم بصراحة مش هقوله اشتم كل حد و اجي على مبارك و أقوله "ستوب تعمل كت كدة !" , لإن مبارك إنسان زي أي إنسان في الدنيا إلا إنه أكثر فسادًا و إجرامًا من أغلب الناس ! بس الشتيمة عمومًا عيب؟ أيوة عيب !

ج – المطالبة بالمحاكمة مش إهانة! المحاكمة نوع من المحاسبة و مفيش إنسان فوق المحاسبة و اللي غلط ياخد فوق دماغه و من حق كل حد اتضرر بسبب نظام مبارك بشكل أو بآخر انه يطالب بمحاسبته و محاكمته!

هسيب الباقي للي يقرى البوست دي... أي حد عنده عبارة تانية في دفاع مبارك يحب أرد عليها أو عنده هو شخصيًا رد عليها يحطها في التعليقات ... مع العلم ان أنا حاولت أرد على العبارات اللي الناس بتدافع بيها عن مبارك مش اللي بتهاجم بيها الثورة ...

و شكرًا J

الفريق سعد الدين الشاذلي يروي حقيقة الثغرة ...

2011-04-25T12:34:00.000-07:00

الفريق سعد الدين الشاذلي, رئيس أركان القوات المسلحة المصرية من سنة 1971 إلى ديسمبر 1973, العقل المدبر لعملية العبور العظيمة في حرب أكتوبر يروي حقيقة الثغرة في الفيديو ده... حقيقة أعتقد كل مصري لازم يعرفها ...
الفريق الشاذلي الذي حاول السادات و مبارك أنهم يمسحوا أثره من التاريخ, و لكن فشلوا رغم مكائدهم و ظل حب الناس ليه كبير إلى آخر يوم في عمره..
رحمه الله و أسكنه فسيح جناته
(الأسباب التي تمنع تطوير الهجوم التي يتحدث عنها الشاذلي هنا هي ضعف القوات الجوية المصرية آن ذاك إذ لم يكن في استطاعتها تغطية أي تقدم للقوات البرية عبر سيناء و عدم وجود دفاع جوي متحرك لصد الضربات الجوية التي قد تشنها إسرائيل لوقف تقدم القوات المصرية، و التي كانت تعتمد عليها إسرائيل بكثرة لقوة قواتها الجوية و ضعف القوات الجوية المصرية أمامها)

Confusion... Darkness... Neglect and Oblivion --- حيرة...ظلمة...تجاهل... نسيان

2011-04-24T08:22:00.000-07:00

أسوأ من أن يضيع منك المفتاح هو أن يكون المفتاح في يدك, و لكن أمامك آلاف الأبواب و لا تدري أي باب هو الذي يفتحه هذا المفتاح. و الأسوأ أن تكون وحدك في حيرتك و الظلام من حولك, و عقلك المشتت لا يدري أيحاول مرة أخرى أم ينهار. و هنا و أنت وحدك تملأ رأسك مئات الآلاف من الأفكار, و يبدأ التساؤل عما يحدث في العالم الخارجي و أنت وحدك بين الأبواب في الظلمة لا تعرف له سبيل. تصلك بعض الأصوات من الخارج: أحاديث متضاربة و ضجة و كل ما تسمعه من كلمات يبدو لك كلغة غريبة أو مجرد كلمات متقاطعة لا يبدو لها معنى. تنظر إلى المفتاح الذي في يدك مرة أخرى... ربما يكون الباب الذي يأتي منه الصوت هو الباب المقصود؟ و بالقليل من الأمل الذي لا يزال بداخلك تساعد نفسك على النهوض و تركض إلى مصدر الصوت. فجأة تتوقف لتحاول التدقيق: "من أين يأتي الصوت؟" .. الصوت يأتي من كل مكان .. أصوات متداخلة تأتي من خلف كل الأبواب الموجودة .. و الحيرة اليأس يزيدان! أين ذاك الباب؟ أين المخرج؟ تصرخ بأعلى صوت عل من في الخارج يسمعك "ألــيس للخروج سبيل؟! كيف أخرج؟ أين الباب؟" و لكن ما من مجيب... يعلو صراخك و يزيد أكثر و أكثر مع كل ثانية تمر, و لا أحد يجيبك, و اليأس داخلك يبدو و كأنه قد بلغ أقصى قدر ممكن. كثير من من في الخارج يسمعون صراخك و كثير منهم لديهم مفاتيح كل الأبواب, و لكنهم لأسباب تبدو غامضة لك يتجاهلون. يحاولون إسكات صراخك بتجاهلهم فتسكت شيئًا فشيئًا ثم تهدأ و تسقط إلى الأرض. تنظر إلى المكان من حولك و تصل إلى القرار الأخير... "يبدو أنه لا سبيل للخروج, و لكن العيش هنا لا يبدو مستحيلًا". فيدفعك اليأس للقبول بعيشة الظلمة المنسية و تحاول القواء و الاستمرار, لأنه لم يعد هناك خيار. تضع المفتاح في جيبك ثم تهدأ و تحاول النوم منتظرًا اليوم التالي لتكتشف الظلمة التي ستعيش فيها إلى أجل غير مسمى و تبحث عن سبل العيش فيها. و تمضي الأيام, و مع كل يوم تحاول اكتشاف سبل جديدة للعيش و النجاة و الاستمرار, تنجح أحيانًا و تخفق كثيرًا. الأيام تمر, و المفتاح لا يزال في جيبك, و الأصوات المتضاربة الآتية من الخارج تهدأ مع كل يوم حتى تكاد لا تسمع, و لكن قلبك و عقلك لا يزالان في انتظار ذاك اليوم الذي يريان فيه الضوء.

هكذا هو حال الجهل...
حيرة...
ظلمة...
تجاهل من الآخرين...
نسيان..

------------------------------------------------------------------------------------------

Worse than losing the key is having the key in your hand but being stuck in a place where there are thousands of doors in front of you, and not knowing to which door the key belongs. And even worse is being alone in your confusion, surrounded by darkness; and your bewildered mind not knowing whether to try again or... collapse. And here, in your loneliness, thousands of thoughts rush through your head, and questions about the outside world that you can't find your way to start to come up. Suddenly, you can hear random sounds coming from the outside: sounds of clashing talks and lots of noise, and the words your can hear either seem like a strange language to you or are merely random meaningless words. You look at the key in your hand once more... Maybe if you follow the noise you'll get to the right door? You help yourself up with the little hope that's still left within you, and you run to the source of the noise, but you stop suddenly... "Where does the noise come from?" .. The noise seems to be coming from everywhere, from behind each and every door in the place... And the confusion and despair seem to be growing bigger and bigger with every moment. WHERE IS THAT DOOR? WHERE IS THE EXIT?! You yell as loud as you can, perhaps somebody from the outside would hear you: "IS THERE A WAY OUT? HOW DO I GET OUT OF HERE? WHERE IS THE DOOR?!" ... but you get no answer. Your yell more and your yelling keeps getting higher and higher, but again no one answers, and its seems like your despair has reached the maximum. Many of those on the outside can hear you clearly, and many of them have the keys to all the doors, but for some reasons that appear mysterious to you they just keep ignoring. They try to silence your yelling with their ignoring, and a little by little they succeed... You stop yelling and drop to the ground. You look at the place around you and in your despair you reach a conclusion: "There seems to be no way out, but living here doesn't seem impossible either!" So, your despair urges you to accept the bitter life of darkness and being forgotten, and you try to survive and move on... because you don't have any other choice! You put the key in your pocket, calm down and try to sleep, waiting for the next day to come so you can discover the darkness that you are destined to live in until God knows when and look for ways to survive in it. The days keep passing by, and with every day you try to look for new methods for survival in your new dark "home", you succeed at times and fail at many others. Days are passing, the key is still in your pocket, and the noises from the outside fade with everyday until they could hardly be heard, but your mind and heart still wait for the day in which they'll be finally able to see the light.

This is how ignorance is...
Confusion...
Darkness...
Neglect...
Oblivion...